هنتكلم النهاردة عن حالة من أغرب حالات الخيانة.
العلاقة بين صابرين وسيد كانت قايمة على المصلحة بس، وهدفهم الأساسي كان الخداع، وجمعتهم قضية غريبة جدًا.
سنة 2012 م، كان في شوية مزارعين ماشيين الصبح بدري في الأراضي الزراعية، ولقوا توك توك محروق.
كان باين على التوك توك إنه قعد يولع فترة طويلة، وكمان لقوا جواه شخص متفحم تمامًا ومش باينله أي ملامح.
كلموا الحكومة بسرعة، وبالفعل الحكومة وصلت بأسرع وقت هي وفريق البحث الجنائي.
وبعد معاينة الحكومة للتوك توك قدروا يكتشفوا إن الموضوع ده بفعل فاعل.
ولما طلعوا الشخص المتفحم ده من التوك توك كان باين إنه مخبوط خبطة كبيرة على دماغه.
كشفت الحكومة وش الشخص ده عشان الناس تتعرف عليه، وفعلًا أول ما الناس شافته قالوا إن ده سمير صاحب مزرعة الفراخ اللي موجودة في المنطقة.
ودلوقتي هنحكي تفاصيل قصة الخيانة الحقيرة، انتبهولها كويس..
بس عشان نفهم القصة دي هنرجع لورا 10 سنين.
سمير في الوقت ده كان عايش في قرية في المنيا هو وعيلته.
كان نفسه طول الوقت إنه يسافر بره في أي بلد عشان يجمع فلوس كتيرة ويحقق أمنيته اللي بيحلم بيها من زمان.
كان بيتمنى يشتري مزرعة فراخ ويفتحها، أوو يشتري قطعة أرض.
وفي نفس السنة دي جاتله فرصة شغل كويسة أوي في الأردن.
سمير سافر بسرعة للأردن، وفي وقت قصير جدًا قدر يكسب ثقة مجموعة كبيرة من الموجودين حواليه، وده لإنه كان شخص متميز وكمان أمين جدًا.
وبعد ما استقر في الأردن سنة ونص رجع المنيا في اجازة عمل.
وصل البيت وحكى لأهله التطورات اللي حصلت في شغله وقد إيه هو بقى متميز فيه.
أهله فرحوا بيه جدًا، وكلامه خلاهم يقترحوا عليه إن هو يتجوز وميركزش في الشغل بس عشان مينساش نفسه.
كانت بنت عمته صابرين هي العروسة اللي رشحوها ليه وقالوله إنها كويسة أوي.
صابرين دي كانت متجوزة قبله وعندها طفل من جوزها الأول.
أهله لما اقترحوا عليه إن هو يتجوز البت دي قالوله إن هي من عيلته وإن هي هتقدر تحافظ عليه في غيابه وهتقدر تحوش ليه فلوس عشان يحقق حلمه.
وفعلًا سمير راح لعمه وطلب إيد صابرين منه وقاله إن هو نازل اجازة لمده شهرين وعنده الشقة والعفش وكل حاجة جاهزة.
طلب من عمه إن هو يتجوز في وقت قليل عشان يعرف يقعد معاها وقت كافي قبل ما يرجع تاني الأردن.
وبالفعل وافق عمه واتجوزها خلال اسبوعين بس.
قعدوا مع بعض فترة وبعد كده عرفها إنه هيسافر الأردن، وهيقعد المرة دي سنة ونص، وهيرجع فيهم 3 شهور اجازة أو شهرين.
وكمان حكى لمراته عن حلمه وهو إنه يشتري قطعة الأرض أو إنه يفتح مزرعة فراخ.
دعيتله صابرين بالتوفيق وقالتله يجمع فلوس على قد ما يقدر وهي هتفضل واقفة جنبه لحد ما يحقق حلمه.
وبعد ما سافر علطول صابرين قعدت تفكر وحست إن هي اتسرعت في قرار الجواز، وكانت حاسة بردو إن الموضوع مش نافع لإنها اتجوزت في فترة قصيرة وجوزها هيغيب عنها سنة ونص.
كانت صابرين في فترة سفر جوزها بتقعد شوية في بيتها وشوية في بيت مامتها.
مر 3 سنين والوضع زي ما هو، بس لاحظ سمير إن هو كل ما يبعتلها فلوس ويرجع في الاجازة ما بيلاقيش معاها أي فلوس محوشاها خالص.
حصلت بينهم مشاكل كبيرة والأهل اتدخلت، وفي الآخر اتصالحوا ورجعوا تاني يعيشون مع بعض.
مرت سنتين كمان على الجوازة دي، والوضع فضل زي ما هو، الزيادة الوحيدة اللي حصلت إن ربنا رزقهم بطفلين.
اتعودت صابرين إنها تعيش لوحدها في بيتها مع ولادها، وكانت بتضايق جدًا لما بيرجع سمير وبيقضي معاها فترة الاجازة.
وكانوا بيتخانقوا دايمًا كل ما يرجع اجازة، وكان السبب الأساسي للخناقات دي هو الفلوس.
وفي يوم أخو سمير كان بيكلمه وهو مسافر وقاله إن في ناس ميعرفوهاش بيدخلوا بيته في غيابه، والموضوع غريب.
كان في مشاكل بين صابرين وأخو سمير، ودايمًا كانت بتقول لسمير إن أخوه ده هو سبب المشاكل اللي بتحصل بينهم بسبب كلامه اللي بيسخنوا بيه، ودا خلا العلاقة بين صابرين وأخو سمير تتقطع خالص.
كلم سمير مراته وسألها مين دول اللي بيجوا بيته وهو مش موجود.
سألها السؤال ده وهو حاسس بشعور غريب لإن هو وأخوه عارفين اخواتها كويس جدًا وأكيد لو اخواتها هما اللي بيجوا هيكون أخوه عارفهم ومش هيقوله إنهم ناس غريبة.
وبعد آخر اجازة رجعها سمير من الأردن قرر إنه هيرجع فلوسه اللي في الأردن كلها وهيلغي شغله اللي هناك.
وكمان قرر إنه يحقق الحلم بتاعه ويفتح مشروع مزرعة الفراخ.
ويرجع عشان يستقر في مصر، والكلام ده كله حصل في سنة 2010.
لما رجع مصر شارك واحد صاحبه وحط كل فلوسه اللي جمعها خلال سنين الغربة في المزرعة دي.
بلغ مراته صابرين إن هو خلاص هيستقر في مصر وهيتابع مشروعه وهيقعد جنبهم طول حياته.
لما سمير قال لصابرين إنه هيحط كل فلوسه في المشروع ده زعلت جدًا عشان هو مفكرش فيها وهي شايلاه طول سنين سفره من غير ما يديها أي فلوس خاصة ليها.
التصرف ده كان غريب جدًا من مراته، بس هنعرف بعد كده إن دي أبسط حاجة هي ممكن تعملها.
بعد ما عدى أربع شهور على مشروعه اكتشف إنه خسر كل فلوسه ومشروعه باظ وكل فلوسه راحت.
في الوقت ده رجع البيت وقال لمراته إن المشروع خسر ومتبقاش معاه أي فلوس.
وبسبب كده حصلت خناقة كبيرة ما بينهم، والنتيجة كانت إن صابرين سابت البيت وراحت قعدت في بيت باباها.
قعد سمير يفكر كتير جدًا إزاي يرجع فلوسه اللي خسرها دي.
وفجأة وهو قاعد في البيت لقى ورق مكتوب فيه حسابات وفلوس محطوطة في البريد باسم مراته.
وساعتها اكتشف ان مراته معاها مبلغ كبير جدًا وحطاه في البنك، وده خلاه عرف إن الفلوس بتاعته اللي كان بيبعتهالها ومش بيبقى عارف هي بتتصرف فين دلوقتي عرف كانت بتعمل بيهم إيه.
وبسرعة راح سمير لصابرين في بيت أهلها وواجها بالورقة اللي فيها الفلوس دي واللي بتثبت إن عندها حسابات في البنك، والخناقة بينهم اتطورت.
وطبعًا في الخناقة دي كان سمير متعصب جدًا وبيزعقلها، ولما مامتها حاولت إن هي تتدخل عشان تهدي الدنيا سمير زقها ووقعها، وبسبب الواقعة دي دراعها اتكسر.
أول ما عمل كده قررت صابرين علطول إنها تنتقم منه.
صابرين كانت شايفة إنها ضيعت حياتها على الفاضي وإن هي ما استفدتش أي حاجة لإن طول الوقت كان جوزها مسافر ومش موجود معاها.
لتكملة القصة اضغط الزر بالاسفل
