كنت بقلب على الفيس عادي لحد ما جالي مسدج من معتز
صورة فستان مكشوف جدا من فوق بس شكله لطيف.
إنما الرسالة اللي بعدها صدمتني
إيه رأيك في الفستان اللي اختارته أمي ليكي يا حور
رديت باستغراب
أمك! هو مكشوف كده ليه!
رد علي بكل جدية كعادته
أيوه أمي هي قالت إنك هتقلعي الحجاب وإن دي ليلة العمر.
اتصدمت من كلامه
ليلة العمر! إزاي يعني هو بيهزر ولا بيتكلم بجد
كتبتله بسرعة
إزاي يعني! إنت بتهزر!
فضلت قاعدة على أعصابي مستنية رده وبعد شوية كتبلي
بتكلم بجد.
قلبي بدأ يدق بسرعة مش بسبب الكلام بس لأ بسبب الصدمة.
إزاي معتز اللي طول الوقت بيوهمني إنه بيحبني وبيحترمني ييجي في لحظة كده ويطلب مني أخلع الحجاب!
مسكت الموبايل بإيد بترتعش وكتبتله
أنا آسفة يا معتز لو شايف إن ليلة العمر معناها إني أتنازل عن مبدأ في حياتي فإنت مش الشخص اللي ينفع أكمل معاه.
شاف الرسالة وسابني من غير رد
عدى وقت طويل ما يقارب الساعة وأنا قاعدة ببص على الشاشة يمكن يرد يمكن يعتذر
بس الرد جه وكان أبرد من التلج
واضح إننا مش هنكمل.
دموعي نزلت من غير ما أحس
مش على معتز لا
على نفسي إزاي صدقت إن في حد ممكن يحبني من غير ما يحاول يغيرني!
إزاي كنت فاكرة إن الحب معناه احترام مش شروط!
قفلت الشات ومسحت صورته
وقلت لنفسي وأنا ببص في المراية
أنا مش هخلع حاجة عشان أرضي حد ولو مش عاجبه هو حر
رجعت من الشغل يومها وأنا متلخبطة مش عارفة أفرق بين الغضب والحزن
جوايا وجع ماكنش سببه معتز لوحده لأ
كان وجع خيبة
أنا إزاي ماخدتش بالي من تفكيره
إزاي كنت ماشية وراه وقلبي سايقني من غير ما أفتح عيني كويس
عدى يوم واتنين وهو كل شوية يبعتلي رسايل أولها ندم وبعدها هجوم
_انتي معقدة
_انتي بتكبري المواضيع
_فرح يعني نعيش اللحظة
_أمي كانت شايفاكي مش قد التغيير
كل كلمة كانت بتخبط في قلبي
بس كل خبطة كانت بتقويني
كل ما كان يحاول يرجعني كنت بتأكد إن قراري صح
أنا مش واحدة بتغير في دينها ولا مبادئها عشان يوم
مش واحدة تبيع حجابها عشان فستان
لكن اللى حصل بعدها ماكنش متوقع
بدأ يستغل شغله علشان يضايقني
يقلب زمايلنا عليا ينشر كلام مش حقيقي يطلعني
قدام الإدارة إني مقصرة
حتى مرة سمعته بيهمس لوحدة زميلتنا
_هي شايفة نفسها ملاك بس مش فاهمة إن الدنيا مش بتمشي كده
كنت هقوم أرد
بس رجعت نفسي
لو نزلت لمستواه هبقى زيه
بس ربنا ما بينساش
جت مديرة الموارد البشرية بنفسها وطلبتني
قالتلي
_أنا متابعاكي من أول ما جيتي وفعلا انتي نموذج للالتزام والشغل الصح وعشان كده الشركة رشحتك تسافري تدريب برا لمدة شهر
كنت هطير من الفرحة
مش بس علشان السفر
لكن علشان أثبت لنفسي قبل أي حد إني ماخسرتش
بالعكس أنا كسبت
رجعت من السفر بعد ما الشهر خلص
وشكلي اتغير
مش لبسي
ولا صوتي
ولا طريقة كلامي
لا
اللي اتغير كانت نظرتي لنفسي
أنا مش مجرد واحدة كانت مخطوبة واتخدعت
أنا واحدة وقفت على رجليها
واشتغلت
وتعبت
وكملت
وف يوم من الأيام
وانا خارجة من الشركة لقيت شخص بيستنانى تحت
كان كريم
مهندس في قسم تاني
مش بيجمعنا شغل كتير بس دايما كان محترم كلماته قليلة وباين عليه إنه متربي
قاللي بهدوء
_ينفع أتكلم معاكي شوية
وافقت
مشيت جنبه على الرصيف الهادي
قدام الشركة
قاللي
_أنا متابعك من بعيد شغلك طريقتك واحترامك لنفسك
وسمعت اللي حصل بينك وبين معتز
وسمعت كمان ازاي وقفتي قدامه وماغيرتيش نفسك علشان حد
سكت شوية وبعدين كمل
_أنا ناوي أتقدم رسمي لو ليا شرف القبول
بس قبل أي حاجة محتاج أسمع رأيك
قلبي دق
مش فرحانة
بس حسيت إن ربنا بيقولي شوفت الخير جاي
قولتله بهدوء
_أنا مش بفكر في جواز دلوقتي ولو حصل في مبدأ عندي مش هيتغير
أنا محجبة وده جزء مني
لا هقلعه في الفرح ولا بعده
ولا هسمع جملة ليلة العمر تستاهل
علشان من وجهة نظري ليلة العمر الحقيقية هي اللي نرضي فيها ربنا
مش اللي نرقص فيها ونغضب ربنا ونسميها فرحة
بصلي بنظرة كلها احترام وقالي
_أنا لو طلبت منك تقلعيه أبقى مش راجل
أنا مش بس موافق ده أنا شايفك أجمل بالحجاب لأنك على طبيعتك
وبعدين مين قال إن الفرح لازم يبقى صخب ورقص ولبس عاري
الفرحة مش في صوت الدي جي ولا في شكل الفستان
الفرحة في طاعة في دعوة الناس لينا وإحساسنا بالبركة
دموعي نزلت ساعتها من غير ما أحس
بس دي ماكنتش دموع حزن
كانت
دموع طمأنينة
لأول مرة من شهور
قلبي حس بالأمان
اتقدم رسمي واتخطبنا
وكل حاجة مشيت زي ما أنا حلمت
فرح بسيط
مفيهوش اختلاط
ولا أغاني بصوت عالي
ولا لبس بيكسر حدود ربنا
بس كان في ضحك
في رضا
في حب نقي
وفي دعوة من قلبي وأنا لابسة فستاني المحتشم
يا رب باركلي فالرجل اللي شاف في طاعتي جمال مش نقص
تمت
فستان_الفرح
حكاوي_كاتبة
حور_حمدان
