كنت لسه داخلة البيت وفي إيدي شنطة فيها فستان الفستان اللي هلبسه يوم ما عدي ييجي يحدد معاد الخطوبة.
أول ما دخلت الأوضة رميت الشنط على السرير وتنهدت بفرحة.
لكن فجأة سمعت مسجين ورا بعض بنغمة معينة أنا حطاها لشات عدي.
مسكت الموبايل بسرعة وفتحت الشات لقيت صورة لإيد عدي عروقه باينة أووي لكن اللي صدمني إن في وسط العروق كان فيه عنكبوتة كبيرة جدا.
قفلت الصورة بسرعة وبصيت على المسج اللي بعدها
شايفة عروق إيدي لما بتعصب بتكون شكلها إزاي يا حور
كتبتله بضحك
حلوة بس شيل العنكبوت اللعبة ده الأول..
لقيته طول في الكتابة شوية لحد ما استلمت المسج
أشيلها إيه بقولك لما بتعصب بتظهر في إيدي
اتجمدت مكاني وكتبتله بديق
إنت بتهزر صح! إزاي يعني بيظهر ده في إيدك! إنت شكلك بتستهبل وبتتسلى وعايز تخوفني عشان نسيب بعض ومتيجيش
تحدد معاد الخطوبة..!
عدى وقت طويل وأنا قاعدة على أعصابي لحد ما لقيته باعت
أخوفك إيه بس أنا ده ظهرلي أصلا من يوم ما قولت أخطبك
حسيت بدوخة وعيني جابت صورة الفستان اللي لسه شارياه الفستان اللي كنت مستنيا اللحظة دي عشانه فجأة فرحتي
اتحولت لقلق.
كتبتله بسرعة
يعني إيه من يوم ما قولت هتخطبني إنت عايز تقول إيه بالظبط
رد بعد لحظات قصيرة
حور أنا مش بهزر. من يوم ما فتحت الموضوع وأنا بحس بحاجة ماسكة في إيدي بتضغط على عروقي وكل ما أعصب أو أفكر
فيكي أكتر بتظهر العلامة دي.
إيدي كانت عمالة تهتز وأنا بمسك الموبايل.
رديت بحدة
بس دي مش طبيعية! إنت لازم تروح لدكتور يكشف يمكن يكون مرض يمكن
قاطعني بمسج تاني أطول
رحت محدش لاقي حاجة. بيقولولي سليم. بس أنا عارف إن في حاجة غلط. من يوم ما حطيت نيتى أرتبط بيكي وأنا حاسس
بحاجة مش عادية. بالليل بحلم بعنكبوت ضخم بيقف عند راسي ويهمسلي بكلام مش مفهوم. والصبح بصحى وألاقي أثر
على جسمي خدوش كأن حد لمسني.
دموعي نزلت من غير ما آخد بالي وكتبت وأنا قلبي بيتقبض
إنت بتخوفني يا عدي متخلينيش أكره اللحظة اللي كنت بستناها.
وبعتلي مسج بعدها خلاني أتشل
أنا مش بخوفك بس يمكن إنت السبب.
وقفت كأني اتصنمت.
أنا السبب إزاي
كتيلي بضيق
واحدة ست كبيرة قالتلي من كام يوم قالتلي إنت معمولك حاجة وإن في جن عاشق متعلق بيها أي حد يقرب منها بيتأذى
وأنا أول ما قررت أخطبك هو مسكني أنا.
أنا قلبي وقع في رجليا الكلمة دي ضربتني كأنها طلقة.
إيدي سابت الموبايل ووقع على الأرض فضلت أبص للسقف من غير ما أرمش.
بعدها مسكت الموبايل بسرعة وكتبت وأنا بعيط
_إنت مصدق الهبل ده إزاي تسمع لكلام ست بتشتغل في الدجل والسحر وتيجي تقولهولي كده!
رد عدي بسرعة كأنه مستني كلمتي
_أنا مكنتش مصدق بس اللي بيحصللي مش طبيعي. إنت مش شايفة آمثير الخدوش دي مش شايفة العنكبوت اللي بيظهر
فجأة أنا مش مجنون يا حور!
وقبل ما ألحق أرد جالي مسج تاني
_أنا خايف عليكي مش عايز يحصللك اللي بيحصلي.
نفسي كان بيقطع مسحت دموعي وبصيت حواليا في الأوضة كأني
متوقعة ألاقي العنكبوت واقف جنبي. كل حاجة كانت ساكتة بس إحساسي كان بيقول العكس
كتبتله بصعوبة
_طب وإحنا نعمل إيه دلوقتي
سكت شوية وبعدين ظهر على الشاشة
_في طريقة الست اللي قالتلي حكتلي إن الحل الوحيد إننا نواجه الجن ده سوا. لو أنا بعدت عنك هيفضل متعلق بيكي
ويأذيكي لكن لو واجهناه يمكن يسيبنا.
اتجمدت كلمة نواجهه كانت تقيلة على قلبي بس جوايا كان في إحساس إني خلاص اتحبست في الدوامة دي.
جسمي بيرتعش والكلام اللي كتبه عدي لسه بيرن في وداني الجن العاشق متعلق بيها
ماقدرتش أنام وكل ما أغمض عيني أشوف العنكبوت الضخم اللي وصفه.
عدي بعتلي
_بلاش تباتي لوحدك الليلة تعالي عندنا ماما وبابا موجودين.
وافقت وأنا مش قادرة أرفض يمكن وجود ناس يخليني أرتاح. رحت أنا وأهلي عند بيتهم الجو كان هادي بس جوايا كان في
قلق مخيف.
قعدنا في الصالون والدته بتتكلم مع ماما وأنا قاعدة جنب عدي حاسة إنه مش طبيعي وشه شاحب وعينيه مشغولة بحاجة
مش شايفينها.
فجأة الكهربا قطعت.
البيت غرق في ظلمة والكل قام بخضة.
عدي مسك إيدي بسرعة وقال بصوت واطي
_هو جه.
قلبي وقع وبصيت حواليا الصالون بقى مليان خيوط عنكبوت رفيعة بتلمع في العتمة وريحة تراب تقيلة مليت الجو.
ماما ووالدته كانوا بيولعوا كشافات الموبايل لكن النور مكانش بيبين غير ظلال عناكب بتجري على الحيطان والسقف.
واحد من إخوان عدي صرخ
_إيه ده!
وفجأة ظهر على الحيطة جنبنا ظل أسود ضخم شكل عنكبوت بحجم
إنسان وعينه حمرا بتبرق.
الهمس جه تقيل
سيبهااا دي ليااااا
الكل اتجمد مكانه وأنا صر خت وفضلت أبص لعدي.
عدي رفع إيده والعروق اللي فيها العلامة المرسومة بالعنكبوت اتوهجت بالحمرا.
أبوه قال بخوف
_إقرأ قرآن بسرعة يا عدي!
عدي بدأ بصوت عالي يقرأ وأنا ببكي وبردد وراه.
الظل صرخ صرخة تهز البيت كله والخيوط بدأت تلتف حواليا كأني الفريسة.
ماما حاولت تجري ناحيتي لكن الشبكة وقفتها.
عدي قفز عليا مسك إيدي جامد وهو يقرأ بصوت أعلى وأقوى.
كنت حاسة الشبكة بتتفتت والظل الأسود بيتآكل كأنه بيتحرق من جوا.
العينين الحمرا اختفت ببطء والجو رجع هادي الكهربا رجعت فجأة كأن حاجة اتقطعت نهائي.
الكل كان واقف مصدوم وأنا كنت مرمية مع أمي بعيط.
عدي قعد قصادي وشه شاحب لكنه ابتسم وقال
_انتهى مش هيقدر يقربلك تاني.
مسكت إيده وأنا ببكي
_أنا السبب في كل اللي حصلك.
هز راسه وقال
_لأ إحنا الاتنين اتأذينا ده كان امتحان لينا والحب هو اللي كسب.
بصيت حوالي لقيت الخيوط كلها اختفت والبيت رجع طبيعي.
أبوه قال وهو بيحاول يخبي صوته المرتجف
_الليلة دي هتفضل محفورة في دماغنا طول العمر.
عدي مسك إيدي قدام الكل وقال
_بس من النهاردة مفيش خوف تاني خطوبتنا هتكمل زي ما حلمنا.
بصيتله وأنا بدمع وفي قلبي لأول مرة حسيت إن الرعب اللي عشناه خلانا أقوى.
يمكن الجن حاول يفرقنا بس الليلة دي أثبتت إن مفيش حاجة أقوى من اللي بيربطنا.
بخخ وحشتوني
كومنتاتتتت كتيررررررةةةة
بقااااا نظرا اني نزلت اسكربت كامل انهاردة
تمت
العنكبوت_الجان
حكاوي_كاتبة
حور_حمدان
