قصتنا النهاردة بتحكي عن محمد اللي عاش مع ناس كل حياتهم اتبنت على السحر الاسود حسب ما بيقول.
القصة دي هتعرفك انه يا اما تعيش عندك يقين ان السحر الاسود ممكن يحول حياتك 180 درجة، أو تكون متيقن ان ربنا سبحانه وتعالى بس هو اللي يقدر يحول حياتك 180 درجة.
الجريمة تمت في عام 2008 م، وبالتحديد في منطقة الدقي، بس عشان نفهم كل تفاصيل القصة لازم نرجع لسنة 1996 م.
في الوقت ده كان محمد لسه مخلص دراسته، واللي هي دبلوم الصنايع.
قعد يشتغل فترة طويلة عشان يكون مبلغ مالي يقدر بيه يحقق حلمه، وهو ان يبقى عنده مكتبة في المنطقة اللي هو عايش فيها في الدقي جنب بيته.
وبالفعل حقق حلمه، وفتح المكتبة جنب جامعة القاهرة، ودي كانت من أقوى المشاريع، لإن الطلبة يا اما طول الوقت بيشتروا أدوات مكتبية أو بيصوروا ورق.
وطبعًا امتلاكه لمكتبة زي دي في الوقت ده كان أهم من انه يفتح محل دهب، فتح المشروع بتاعه وكان عمره في الوقت ده 22 سنة، وبالرغم من ان سنه صغير إلا ان الناس لما كانت بتقعد معاه كانت بتحس ان سنه كبير.
لإنه لما نزل السوق بدري وهو سنه صغير نضج بسرعة، بسبب انه اتعامل مع ناس كتيرة، وأخد منهم خبرة كبيرة في الحياة.
وده اللي خلاه يتشجع ويفتح المشروع ده.
وهو كان الشخص العاقل في عيلته، اللي مكونة من أم وأب وأربع اخوات.
وفي الوقت ده كان محمد هو الشخص المسؤول عن عيلته بشكل كامل.
ومن كتر ما هو كان بيهتم بأهله ويصرف عليهم ربنا سبحانه وتعالى فتح عليه بيبان الرزق، وفتح أكتر من مكان للتصوير في المكتبة بتاعته، واشترى ماكينات تصوير كتير، وربنا وسع رزقه.
وبقى مشهور جدًا في المنطقة بتاعته، وكان كل الشباب بيشوفوا محمد هو النموذج الناجح اللي يقدروا يقتدوا بيه، لإنه قدر يحقق حلمه في في سن صغير.
وتمر السنين لحد سنة 2002 م.
في الوقت ده محمد اتعرف على بنت جميلة، البنت دي كان اسمها نهاد، وكانت بتيجي المكتبة علطول، عشان تصور ورق أو تشتري أدوات مكتبية، وهي كانت ساكنة معاه في نفس المنطقة في الدقي.
البنت دي كانت جميلة جدًا، ولفتت نظر محمد، وقرر انه يتكلم معاها ويقولها انه معجب بيها.
وأول ما فتح معاها الكلام اتجاوبت معاه علطول لإن هو كان مشهور عندهم في المنطقة ومعروف انه الشاب الصغير الناجح واللي عنده مشروع خاص بيه وبيطلع منه فلوس كتيرة.
وكانت نهاد بتروحله المكتبة كتير عشان يعجب بيها ويتخطبوا.
وتمر الأيام ويرتبط محمد ونهاد، وأهلهم هما الاتنين يكونوا عارفين، بس أهل نهاد رافضوا انها تتخطب قبل ما تخلص دراستها.
فضلوا مرتبطين لمدة 3 سنين، وفي الوقت ده كان كل الناس بتسأل محمد هو سأل عن عيلة البنت دي ولا ارتبط بيها كده وخلاص.
بس كان كل اللي يعرفه محمد عن عيلة نهاد ان باباها إنسان غني ومعاه فلوس كتيرة وعنده أملاك كتيرة، بس محدش عارف مصدر فلوسه دي ايه، وكان عنده بيت اربع أدوار وعنده مكتبة في شارع صغير.
بس الظاهر ان في معلومات تانية، كان الناس عايزين محمد يعرفها لكن هو مكانش فارق معاه الموضوع ومدورش عشان يعرفها.
في فترة الارتباط اللي هي 3 سنين محمد اسلوبه اتغير مع كل الناس حتى في الشغل، وكان أي طلب تطلبه نهاد أو أمها لازم يتنفذ في نفس الوقت، ومحمد مكانش عارف هو بيتصرف كده ليه.
وفجأة لقى صورة لخطيبته نهاد منشورة وملزوقة في كل المنطقة وكل الشباب والأهالي شافوها، والصورة دي كان مكتوب عليها كلام مش كويس وشتايم.
اتفاجئ محمد إن أهل نهاد بيتهموه انه اللي عمل كده في بنتهم ورفعوا عليه قضية وعايزين يحبسوه كمان.
وبالرغم من أنه نفى كتير، وقال انه مالوش علاقة بالموضوع ده، بس هما كانوا مصممين انهم ياخدوا الإجراءات القانونية ضده.
الغريب ان محمد ونهاد كانوا بيحبوا بعض، وكمان كان أهلهم عارفين، وعلاقته مع أهلها كانت كويسة جدًا، طب ايه اللي هيخليه يعمل فيها كده، وازاي هما يشكوا انه ممكن أصلًا يعمل كده.
بالرغم من إن كان في خلافات بسيطة بتحصل ما بينهم، بس كلها كانت خلافات عادية، وممكن تحصل بين أي شخصين مرتبطين، بس الموضوع مش ممكن يوصل أبدًا للمرحلة دي.
كمان هما اللي كانوا مصممين يأجلوا الخطوبة، يعني مفيش أي داعي انه يعمل الموضوع ده.
ومحدش فاهم اللي كان بيحصل ايه سببه أصلًا.
محمد في نظر القانون بقى هو المتهم، بس قدر أن هو يثبت ان ده مش خطه، وانه مالوش أي علاقة بالصور دي، وبعد فترة خرج من القضية واتقفلت خالص.
بعد ما خرج من القضية قطع علاقته بنهاد وعيلتها بشكل نهائي، وفي الوقت ده كل الناس اللي بتحبه باركتله انه سابهم وبعد عنهم.
مرت أربع شهور على انتهاء العلاقة دي، وفي الوقت ده محمد حاله اتبدل، وبقى مش مركز طول الوقت وسرحان وبيفكر في نهاد علطول وبيشوفها في أحلامه، وساعات كان بيشوفها واقفة قدامه كإنها حقيقة.
وكان لما بيحكي لأي حد عن اللي بيشوفه كان بيتقاله ان هي عاملاله سحر، لإنها كانت مأثرة عليه بشكل كبير.
وفي آخر فترة في الأربع شهور وقفت قدامه نهاد بشكل حقيقي، ومحمد فضل واقف ساكت كإنه كان مستنيها.
حس ان الروح ردت فيه تاني وراح معاها بيت أهلها واعتذر ليهم عن انه غلط فيهم لما اتهموه انه اللي عمل كده في بنتهم.
الغريب انه أصلًا مكانش عاملهم حاجة، وهما اللي اتهموه وفي الآخر هو كمان اللي يروح يعتذرلهم!!
وفي نفس القعدة اللي اعتذرلهم فيها طلب ايدها عشان يخطبها، وأهلها وافقوا في نفس الوقت.
كده كانت العلاقة قبل الخطوبة مدتها أربع سنين، ولما اتخطبوا اتفقوا ان فترة الخطوبة هتكون سنة، وكده مدة علاقتهم ببعض كلها هتكون خمس سنين.
كان محمد عارف ان بيحصل استغلال ليه بشكل كامل في علاقته مع نهاد طول السنين اللي قداها معاها، بس مكانش بيعمل أي رد فعل.
وكان حاسس انه فقد السيطرة على نفسه، كان كل اللي بتطلبه نهاد بيحصل رغم انه شايف من جواه انه مينفعش يحصل.
الناس فضلت تقول ان محمد معموله سحر اسمه سحر الربط، وهو مربوط بنهاد وميقدرش يعمل أي شيء إلا وهي موجودة.
بس محمد مكنش مصدق أي حاجة من اللي بتتقال، بس بعد ما اتخطبوا بدأ يصدق ان فعلًا في سحر بيحصل معاه.
واللي خلاه يتأكد من الموضوع ده انه عرف بالصدفة ان مامتها بتعمل سحر وأعمال للناس بشكل سري.
واتأكد أكتر لأنه لما بيكون في أي مشكلة ورايح يحلها عند أهلها، ومامتها بتعمل ليه أكل أو شرب بيحس بطعم غريب ومختلف عن طعم الأكل الطبيعي.
والغريب إن بعد ما بياكل الأكل ده أو يشرب الشرب اللي بيتقدمله بيحس إن مفيش مشكلة أصلًا، وكمان بيعتذر لنهاد قدام أهلها.
مرت فترة كبيرة ومحمد كان بيفضل سرحان طول الوقت، ومش مركز في أي حاجة، حتى الشغل بتاعه مبقاش مركز فيه خالص.
وفي السنة بتاعت الخطوبة دي محمد قرر كذا مرة انه يسيبها، بس كل ما كان بيجي يسيبها بتحصله حاجة غريبة وبيكمل معاها.
محمد سمع كلام الناس اللي كانوا بينصحوه انه لازم يسأل عن عيلة البنت دي، وفعلًا راح وسأل شخص كان بيثق فيه جدًا عنها، وقعد وحكاله حكاية غريبة عن جدة نهاد.
جدتها أم والدتها من حوالي أكتر من 10 سنين كانت مشهورة بأعمال السحر الاسود في المنطقة اللي هما عايشين فيها، وكان معاها دايمًا قطه سودا بتروح معاها في كل حته.
وفي ناس كتيرة لاحظوا ان القطة وجدتها كانوا بيتكلموا مع بعض.
وكمان في ناس سمعوا القطة وهي بتتكلم مع جدتها، وكانوا بيقولوا ان جدتها دي كانت بتعمل كل أعمال السحر سواء كانت الكبيرة أو الصغيرة.
لحد ما في يوم من الأيام سمعوا ان جدتها دي ماتت، وكان الموته مش طبيعية، الناس دخلت عليها الأوضة ولقوها هي والقطة بتاعتها مدبوحين.
الشرطة قبضت على الشخص اللي عمل كده، وقالهم إن هو عمل كده عشان هي كانت عاملاله سحر اسود، وكان معطله كل خير في حياته.
وقال كمان ان هي كانت بتسيطر عليه بشكل كامل، وعشان يخلص من السيطرة دي قرر انه يدبحها هي والقطة.
محمد حاول يتأكد من كذا شخص اذا القصة دى حقيقية ولا لا، وكل الناس أكدوله ان القصة دي حقيقية فعلًا.
وهنا قعد مع نفسه وعرف هي ليه الناس كانت عاوزة تعرف منه هل هو سأل عن العيلة دي ولا لا، كل ده عشان كانوا عايزينه يعرف المعلومة دي.
ولفت نظر محمد حاجة غريبة، وهي ان أبو نهاد مالوش أي دور في حياتهم، وان كل اللي بتتفق على كل حاجة هي الأم، وهو مجرد شكل.
طبعًا محمد في البداية كان حاسس انه معموله سحر، بس بعد الحكايات دي بدأ يتأكد انه الموضوع سحر حقيقي.
محمد قال انه عشان يخلص من السحر ده لازم يخلص على كل العيلة، وبدأ يخطط انه يعمل ده فعلًا.
وفعلًا بدأ تنفيذ الخطة ونزل اشترى طقم سكاكين جديد وقعد يفكر ازاي هيقدر يخلص عليهم كلهم في وقت واحد.
قرر محمد انه هيروح ليهم البيت وياخد السكاكين معاه وهناك يفكر هو هيعمل ايه.
راح محمد يزورهم اكنها زيارة عادية، الساعة 3:00 العصر، رحبت بيه مامت خطيبته واختها، وخطيبته كانت بره بتشتري طلبات.
اخت خطيبته عملت ليه الشاي وطلعت عشان تشوف اختها اللي كانت في الدور الرابع وبتنضفه.
وفجأة لما وصلت للدور الثالث سمعت صوت صريخ عالي، نزلت بسرعة ولقيت محمد ماسك مامتها وبيـــ*د*بـــ*حها، وفصل راسها عن جسمها.
ولما حاولت تقاومه عورها بالســـ*كـ*ـاكــــ*ين في كل حته في جسمها.
وقبل الحوار ده علطول كان باباها نزل يصلي العصر.
رجعت البنت تاني للدور التالت، ووقفت في الشباك تصوت وتنادي الناس عشان يجوا ينقذوهم، وقفلت الباب عليها من كتر الخوف.
وهي واقفة في الشباك لقت اختها اللي في الدور الرابع خارجة وبتنزل د*م من بطنها ورقبتها وعمالة تقول ان محمد خلص على مامتها.
محمد جري وراها في الشارع ودب الســ*كـــ*ينة فيها لحد ما خلص عليها، ووقعت على الأرض ميتة.
الناس اتجمعت عشان ينقذوا البنت دي منه، بس معرفوش لان كانت حالته غريبة جدًا.
في الوقت ده كانت خطيبته جاية من بعيد، وشافت خطيبها وهو ماسك الســـ*كـــ*يـــ*نة في ايده واختها وهي مرمية على الأرض وحواليها الد*م.
ولسه كانت هتقرب منه، بس هو جري عليها وهو ماسك الســــ*كــ*يــــ*نة، وغر*س*ها في قلبها لحد ما وقعت ميتة هي كمان.
فضل واقف محمد بالسكنتين، ومستني الأب يرجع من صلاة العصر عشان يخلص عليه هو كمان.
ورجع تاني البيت عشان يطلع لأختهم اللي في الدور التالت، ويخلص عليها، بس معرفش يعمل كده عشان هي كانت قافلة الباب عليها جامد.
وفجأة فاق من اللي هو كان فيه واكتشف اللي عمله، وقعد على الأرض وسط الد*م، وفضل مستني رجالة الشرطة عشان يوصلوا.
كل اللي كان بيردده محمد في الوقت ده انه أخيرًا اتخلص منهم كلهم.
وصلت الشرطة ولقت محمد مستسلم تمامًا ومستنيهم، ونقلوا الأم وخطيبته وأختها على الطب الشرعي اللي اكتشفوا انه طــ*عـــ*نهم طــ*عـــ*نات كتيرة وخلص عليهم.
وفي التحقيقات محمد قال انه مش حاسس بالندم عن أي حاجة عملها، وكمان قال انه كان نفسه يموت الأخت الباقية ويموت الأب.
وكان طول الوقت بيقولهم ان عايزهم ينفذه فيه حكم الإعدام عشان هو مش عايز يعيش وقت أكتر من كده.
وفعلًا النيابة حكمت عليه بالإعدام عشان ده قتل مع سبق الترصد.
وكمان عشان هو اعترف بكل حاجة عملها.
وطبعًا النيابة اعتبرت كل الكلام اللي حكاه محمد عن خطيبته وأمها ان دي وجهة نظره، وقالتله ان مفيش مبرر يخليه يقتل أي حد عشان شاكك انه عامله سحر.
في نهاية القصة دي لازم نتعلم إن بالرغم ان السحر مذكور في القرآن، بس ربنا سبحانه وتعالى قادر أن هو يحميك لو انت داعيته يحميك من أي سحر.
وإن لازم المؤمن يكون متيقن بإن محدش يقدر يعمله حاجة من غير إذن الله سبحانه وتعالى، وإن ربنا مش بيغفر لأي حد يأذي الناس ويعملهم سحر.
